عرض مشاركة واحدة
قديم 24-10-2015, 18:07   #1
صديق وفي
 
الصورة الرمزية ashtar
 
تاريخ التسجيل: 05 2009
الدولة: فلسطين
المشاركات: 6,784
معدل تقييم المستوى: 23
ashtar is on a distinguished road
افتراضي نص نصيص ..... قصة شعبية فلسطينية

قصة نص نصيص - حسن وحسين واخوهم نص نصيص






واخوهم, وحسين, نصيص

قصة نص نصيص - حسن وحسين واخوهم نص نصيص

كان يا ماكان في قديم الزمان وما يحلى الحكي الا بالصلاة على النبي " اللهم صلي وسلم وبارك على سيدنا محمد "

كان في ثلاث اخوان حسن وحسين من أم وأخوهم نص نصيص من أم ثانية مسكينة و حزينة وكبيرة بالسن وقصتها في هالخلفة انه مرت اليام عليها إلا هالعجوز لايصه عليها لابسه هالثوب المطرز والمخرز ومعاها سلة هالتفاح اشي بشهي بلمع لمع ولونه أحمر مش طبيعي وبتنادي وبتقول معي تفاح للحبل .. وقفتها السلفة الثالثة واشترت منها حبة مشان تحبل ..
والله وأخذت هالحبة وحطتها ع رف المطبخ وبلشت تشتغل ونست تاكلها .. أجى جوزها واكل نصها وتركلها النص الثاني ..
أكلتها ع الساكت وما تخرفت هالمخلوقة .. وثاني يوم إلا هي حامل وبعد تسع أشهر جابت هالولد ما شاء الله بجنن بس هالحزين نص ولد قد الكبشة .

شكرت الحزينة هي وجوزها ربهم ع الولد وقرروا يسموه نص نصيص ..
مرت الأيام وكبروا الأولاد وصاروا شباب ..
كان عند الأب حصانين وبارودتين وغنمة ومقليعة فوزعها ابوهم على اولاده الثلاثة فصارو كل يوم والثاني يطلعوا يصيدوا مشان أهليهم .. حسن وحسين يركبوا ع الخيول أما الحزين نص نصيص يركب ع الغنمة ..
وكان شاطر في التنشيل أخو الشلن معه مقليعة بتقلع عين الصخر بس يمغطها اضرب الا هو صايب الإشي ..
واخوانه زي الهبايل معهم بواريد بس ع الفاضي ..
هو يصيد وهمه يذبحوه من الكتل وياخذوا الصيده ويكحشوه وياخذوه الصيد ويعطوه لأمهاتهم وبس يطبخو وياكلوا يرموا العظمات والريشات ع باب دار نص نصيص .. والحزين كان يقولهم انو هو اللي بصيد ومحدش يصدقه ..
ابوه لنص نصيص شك بالموضوع .. وثاني يوم بس طلعوا ع الصيد لحقهم وتخبى ورا الشجرة وشاف نص نصيص بصيد واخوانه بعرفوش وبس اجو بدهم يضربوه طلعلهم من ورا الشجرة وضربهم واخذ الصيد ورجعوا ع الدار طبخوا ورموا العظام باب دار المرة الثانية . شو السر ورا رمي العظام بدريش ما علينا
اتفق حسن وحسين يروحوا ع بلاد بعيدة وياخذوا نص نصيص معهم لأنه الكل صار يعرف انهم كذابين ..

قام نص نصيص قلهم احنا الثلاث بنصيد وبنقسم بينا لأنا اخوان حتى انه يقربهم اله . والله صار زي ما بدهم وضلهم يمشوا يمشوا يمشوا لما وصلوا بلد فيها بطرفها بيت غريب فيه مرة عجوز بتحاوي ورا هالديك .. فقالوا خلينا نروح نرتاح عندها ونوكل لكمة . قلهم نص نصيص ولكم هاي الغولة بلاش نروح لكنهم ما ردوا عليه ولما شافتهم قالتلهم أهلا وسهلاً بولاد أخوي .. بدي اذبحلكم هالديك وأطبخلكم اياه ع مفتول وأعشيكم عليه ..
والله ذبحت هالديك وطبخت عليه مفتول وتعشوا واجى وقت النوم .. فرشتلهم هالفراش .. ونام حسن وحسين ونص نصيص ضله واقف ... قالتله مالك ؟ قلها بعرفش انام إلا في قرطلة ( سلة معلقة بسقف البيت ) .. ومعي عرام فول ..
والله عملت اللي بده اياه ونامو لكن نص نصيص ظل صاحي ويطلع من القرطلة ..

وفي نص الليل وهم نايمين صحيت الغولة واجت عندهم وصارت تسن بسنانها وتقول " أمضين يا سناني أمضين ع حسن وحسين واخوهم نص نصيص " وقتها نص نصيص قرط حبة الفول قالتله مالك صاحي .. قلها كيف أنام كيف انام وقلبي خالي من الطعام " قامت عملتله جوز حمام محمر ومقمر ..وما خلصت الا الشمس طالعة .. راحت تسرح في البراري وهو حط راسه ونام وثاني يوم نفس الإشي صار وبس اجت عندهم وصارت تحكي أمضين يا سناني أمضين .. قرط حبة الفول وحكالها كيف أنام وقلبي خال من الطعام .. راحت جابت خروف بلدي وبلشت تذبح فيه وتسلخ وتقطع وتطبخ لوجه الصبح وطلع النهار عليها بس خلصت وراحت سرحت في البراري فز الحزين خايف وقال لاخوانه قوموا يا ملعونين الوالدين هاي غوله بدها تذبحنا وتاكلنا .. قوموا خلونا نشرد ..
مردوش عليه وقالولوا هاي عمتنا وانت بتحبهاش لأنها بتحبنا اكثر
ركب ع هالغنمة وشرد وهمه من الغيرة والبلا قاموا لحقوه وشردوا وراه .. روحت الغولة ع الدار ولقتهم هاربين عضت ع أصابعها ندم وقالت والله غير اوكولهم ..
طلعت ع ظهر المغارة ونادت بصوت عالي .. " ريت يا نص انصيص النخاله اللي أكلتهاغنمتك تقعد في اجريها والحقك وأوكلك. وريت يا حسن وحسين الشعير اللي أكلنه الخيل بعّقل في اجريهن والحقكم وأوكلكم"
شوي الا هالخيل بتعقل في رجليها الشعير وبتبطل تمشي خافوا المسخمين بس نص نصيص كان يطعمي غنمته عرام الفول ركب اخوانه معه وهربوا < اه بتستحمل الغنمة 3 اشخاص
والله وصلوا بالسلامة والحمد لله ع سلامتهم .. في الليل الا نص نصيص بحكي لاخوانه شو رأيكم اجيبلكم فراش الغوله وجاجاتها ؟
تحدى هو واخوانه وفي نفس الليلة تسلسل ع دار الغوله وحطلها إبر في الفراش .. وتخبى برا الدار اجت بدها تنام صارت تقول يما البراغيث يما اكلن جسمي ..
مسكت هالفرشة ورمتها ع طول إيدها .. اخذها نص نصيص وروح فيها ع دار ابوه ..
ثاني يوم قلهم شو رأيكم اجيب جاجات الغوله تحدوه وراح ركاض ع دار الغوله في الليل بس فات ع الخم صاح الديك " ككس كيكس نص نصيص في الخم بكحش وبلم " اجت الغوله دورت ع نص نصيص قام اتخبا في الخم وقامت الغولة مدت ايدها تدور ع نص نصيص قام بهالإبرة وغزها صاحت وقالت عزيين كيف بتظحك علي وقالت للديك أنخم نص نصيص في بلاده "
أجى نص نصيص خنق الديك واخذ الجاجات وهرب ووداهن ع دار ابوه
ثاني يوم الا هو بتفلسف وبقول لاخوانه شو رأيكم اجيبلكم الغوله بحالها !!
ايه يا ملعون الحرسي شو موديك عندها والله لتوكلك .. صار يقولهم ما عليكو انا راح اجيبها ..
والله ثاني يوم لبس هاللبس وتنكر وجاب حمار وحط ع ظهره صندوق حط جواته سدر حلاوة " كريزة " وحط ع عينه خرية ناشفة وصار يبيع في بلاد الغوله وكانت تموت بالكريزة..
طلعت الغولة بدها تشتري بذهبه .. قلها يا خالتي الذهبة بتجيب حلاوة أكثير وانا معيش فراطة .. أطلعي اقعدي في الصندوق وكلي لتشبعي .. قالتله والله كأني شايفتك هاي العين بتشبه عين نص نصيص .. قلها يا خالتي انا بعرفوش للقاروط بسمع عنه سمع .. والله هي ضلت توكل توكل لحد ما خلصت السدر .. اجى هو سكر عليها الصندوق وقعد فوقه وصار يقولها طقي موتي انا نص نصيص يا غوله ..
صارت تصرخ وتقوله افتحلي وبعطيك اللي تحت اجر الخابية .. قلها طقي موتي كلهن الي ..
رجعت قالتله افتحلي وبعطيك الذهب الي في المطرح الفلاني .. وهو يقولها طقي موتي كلهن الي ..
أخذها ركاض ع دار ابوه وقلهم أغلولي برميل مي .. وبس غليت المي دارها فوق الغولة وماتت .. وخلص الناس من شرها ..
وأخذ الذهبات وكل القصص اللي حكتله عنهم ..
وصار هو واهله من اغنياء البلد ..
وطار الطير الله يمسيكو ويصبحكو بالخير
وتوته توته خلصت الحدوته حلوة ولا فتفوته


للي بعرفش بعض المعاني :
لايصه : قادمة من بعيد
مقليعة : أداة مصنوعة من المطاط " المغيط " والحديد تستخدم للصيد
القرطلة : سلة صغيرة مصنوعة من أغصان الزيتون .
عرام : مقداره كف اليد
بتحاوي : اي تيجيه من اليمن والشمال بغرض ان تمسك به
أمضين : أي تمضي وتصبح حادة من أجل تقطيع الطعام ..
الخم : دار الجاج




__________________

ashtar غير متواجد حالياً   رد مع اقتباس